മണ്ഡല മകരവിളക്ക് സീസണിൽ ഗുരുവായൂരിൽ ശബരിമല തീർത്ഥാടകർക്ക് ആവശ്യമായ സൗകര്യങ്ങൾ ഏർപ്പെടുത്തുന്നതിന് എൻകെ അക്ബർ എംഎൽഎയുടെ അധ്യക്ഷതയിൽ യോഗം ചേർന്നു. ശബരിമല തീർത്ഥാടകർക്കായി വളരെ വിപുലമായ രീതിയിൽ പാർക്കിംങ്ങ് സൗകര്യം ഏർപ്പെടുത്താൻ ദേവസ്വം തീരുമാനമെടുത്തിട്ടുണ്ടെന്ന് ദേവസ്വം ചെയർമാൻ ഡോ.വി കെ വിജയൻ അറിയിച്ചു.

പടിഞ്ഞാറെ നടയിലെ മായബസ് സ്റ്റോപ്പിന് മുന്നിൽ വലിയ വാഹനങ്ങളും എംഎൽസിപിയുടെ തെക്ക് ഭാഗത്ത് ബൈക്കും പാഞ്ചജന്യം, ദേവസ്വം ആശുപത്രി എന്നിവിടങ്ങളിൽ വാഹന പാർക്കിംങ്ങിനും സംവിധാനവും ഒരുക്കുമെന്ന് ദേവസ്വം ചെയർമാൻ അറിയിച്ചു. സ്കൂൾ അവധി ദിവസങ്ങളിൽ ശ്രീകൃഷ്ണ ഹയർ സെക്കന്ററി സ്കൂൾ ഗ്രൗണ്ടിൽ ചെറിയ വാഹനങ്ങൾ പാർക്ക് ചെയ്യുന്നതിന് സജ്ജീകരണം ഒരുക്കും.

തീർത്ഥാടകർക്കായി ഗുരുവായൂർ ക്ഷേത്രത്തിൽ ദർശന സമയം വർദ്ധിപ്പിച്ചിട്ടുണ്ട്. ഔട്ടർ റിംഗ് റോഡിന്റെ പണികൾ അടിയന്തരമായി പൂർത്തീകരിക്കും. ദേവസ്വം ആശുപത്രിയിൽ തീർത്ഥാടകർക്കാവശ്യമായ സൗകര്യം ഒരുക്കുമെന്ന് ദേവസ്വം അറിയിച്ചു.

ദേവസ്വവും ഗുരുവായൂർ നഗരസഭയും ശുചീകരണ തൊഴിലാളികളെ നിയമിക്കും. ആവശ്യമായ മുഴുവൻ സ്ഥലങ്ങളിലും സ്ട്രീറ്റ് ലൈറ്റുകൾ സ്ഥാപിക്കും. നഗരസഭ തീർത്ഥാടകർക്കായി താത്കാലിക മെഡിക്കൽ സെന്ററുകൾ ആരംഭിക്കും. ഗുരുവായൂരിൽ കുടിവെള്ള വിതരണം കൃത്യമായി നടത്തുമെന്ന് വാട്ടർ അതോറിറ്റി അറിയിച്ചു. പൊതുമരാമത്ത് വകുപ്പിന്റെ നിലവിലുള്ള റോഡുകളുടെ പണി ഏകദേശം പൂർത്തിയായതായി പൊതുമരാമത്ത് വകുപ്പ് യോഗത്തിൽ അറിയിച്ചു.

നവം.17 മുതൽ കെഎസ്ആർടിസി ഗുരുവായൂരിൽ നിന്ന് ശബരിമലയിലേയ്ക്ക് സ്പെഷ്യൽ സർവീസ് ആരംഭിക്കുമെന്ന് അധികൃതർ അറിയിച്ചു. അടിയന്തരമായി പഴയ ഫയർഫോഴ്സ് കെട്ടിടം നിലനിൽക്കുന്ന സ്ഥലം ശുചീകരിച്ച് വാഹന പാർക്കിങ്ങ് ചെയ്യുന്നതിനാവശ്യമായ നടപടി സ്വീകരിക്കാൻ എംഎൽഎ നിർദ്ദേശം നൽകി.

മണ്ഡല മകരവിളക്ക് സീസണിൽ കെഎസ്ഇബി ഗുരുവായൂരിൽ പ്രത്യേക ഓഫീസ് സംവിധാനം ഒരുക്കുമെന്ന് അധികൃതർ അറിയിച്ചു. കുടിവെള്ള ലഭ്യത ഉറപ്പുവരുത്തുന്നതിനായി ഇല്ലിക്കൽ റഗുലേറ്ററിലെ ഷട്ടറുകൾ തുറക്കുന്ന സംബന്ധിച്ച് മാർഗനിർദ്ദേശം ഉറപ്പുവരുത്തണമെന്ന് ആവശ്യപ്പെട്ടു. ഇത് പ്രകാരമുള്ള ക്രമീകരണങ്ങൾ ജില്ലാ ഭരണകൂടം ഉറപ്പുവരുത്തേണ്ടതാണെന്നും എംഎൽഎ നിർദ്ദേശിച്ചു. ക്ഷേത്ര നഗരിയിൽ രാത്രി കാലങ്ങളിൽ പൊലീസ് പെട്രോളിങ്ങ് ശക്തമാക്കണമെന്ന് എംഎൽഎ ആവശ്യപ്പെട്ടു. നഗരസഭയിലെ ആരോഗ്യ സ്ഥാപനങ്ങൾക്കും താൽക്കാലിക മെഡിക്കൽ സെന്ററുകൾക്കും ആവശ്യമായ മരുന്ന് ലഭ്യത ഉറപ്പുവരുത്താൻ ജില്ലാ മെഡിക്കൽ ഓഫീസർക്ക് നിർദ്ദേശം നൽകി.