കേന്ദ്ര ധനമന്ത്രി നിർമല സീതാരാമൻ അമേരിക്കയിലേക്ക്

 

ഡൽഹി: കേന്ദ്ര ധനകാര്യ മന്ത്രി നിർമ്മല സീതാരാമൻ അമേരിക്കയിലേക്ക് പുറപ്പെട്ടു. ലോക ബാങ്കിന്റെയും അന്താരാഷ്ട്ര നാണയ നിധിയുടെയും വാർഷിക യോഗങ്ങളിലും ജി20 രാജ്യങ്ങളിലെ ധനകാര്യ മന്ത്രിമാരുടെയും കേന്ദ്ര ബാങ്ക് ഗവർണർമാരുടെയും യോഗത്തിലും പങ്കെടുക്കുകയാണ് ലക്ഷ്യം. ഒക്‌ടോബർ 11 മുതൽ 16 വരെ 6 ദിവസത്തെ യുഎസ് സന്ദർശനത്തില്‍ മന്ത്രി യു എസ് ട്രഷറി സെക്രട്ടറി ജാനറ്റ് യെല്ലനെയുമായും ലോക ബാങ്ക് പ്രസിഡന്റ് ഡേവിഡ് മാൽപാസുമായും കൂടിക്കാഴ്ച നടത്തും.

കൂടാതെ ധനകാര്യ മന്ത്രി വിവിധ രാജ്യങ്ങളുമായി ഉഭയകക്ഷി ചർച്ചകളിലും ഏർപ്പെടുമെന്നും കേന്ദ്ര ധനകാര്യ മന്ത്രാലയം വിശദീകരിക്കുന്നു. ജപ്പാൻ, ദക്ഷിണ കൊറിയ, സൗദി അറേബ്യ, ഓസ്ട്രേലിയ, ഈജിപ്ത്, ജർമ്മനി, യുഎഇ, ഇറാൻ, നെതർലൻഡ്സ് എന്നീ രാജ്യങ്ങളുമായാകും കേന്ദ്ര ധനകാര്യ മന്ത്രി ഉഭയകക്ഷി ചർച്ചകൾ നടത്തുക. ബ്രൂകിങ്‌സ് സർവകലാശാലയിൽ ഒരു സെമിനാറിലും കേന്ദ്ര ധനകാര്യമന്ത്രി പങ്കെടുക്കുന്നുണ്ട്.